004r - - - - - Vernis d’huile d’aspic
Il fault faire chaufer l’huile d’aspic, & comme il commance
à fremir, mects dedans la gomme de sandaraque en pouldre
affin qu’il soict bien tost fondu. Et remue tousjours jusques
la sandaraque soict bien fondue sur foeu de charbon, ce
que tu cognoistras en prenant un peu dudict vernis sur
une assiette. Et s’il est gras en le maniant avecq le doigt,
c’est faict. Et pour une lb d’huile d’aspic, tu mectras
cinq onces de sandaraque pulverisée, combien qu’aulcuns
n’en mectent que quattre onces, mais il n’est pas si bon
ni si gras. Cestuy cy est promptement sec. Les quadraniers,
pour eviter la peyne de polir leur hebene, le vernissent de
cestuy cy, les quiterniers aussi. Cestuy cy n’est pas si
propre pour les tableaulx que celuy de tourmentine fine,
bien est il bon pour les mouleures des tableaulx. On ne
souloit poinct vernir les païsages d’un tableau quand le
vernis de lin estoict en usage, pour ce qu’il faisoict jaulnir
le païsage. Mays avecq celuy de tourmentine, on vernist
partout. Tu y peulx mectre du mastic pulverisé tiré en larme ou
aultrement, & il sera plus desiccatif, au lieu de sandaraque.
Si tu veulx vernir sur le plastre ou muraille, donne
premierement ta colle de retaille bien chaulde, car si elle
estoict refroidie elle n’entreroit poinct dans la muraille,
& quand tu y aurois mis ton vernis elle s’enleveroit.
at left top margin
Le vernis d’huile
d’aspic n’est pas si
propre pour les couleurs
que celuy de tourmentine,
car l’huile d’aspic
faict mourir mange les couleurs
pour estre trop penetrant.
Pour oster le vernis d’un
vieulx tableau qui est jaunastre
& le vernir de nouveau
Prens du savon blanc & de la cendre tamisée, & le tout
destremper dans de l’eau. Et avecq une esponge, prens de
ladicte cendre & savon & en frotte le tableau. Et comme
tu verras que le vieulx vernis sera oste, jecte un seau
d’eau contre le tableau pour le nettoyer. Aprés mects le
un quart d’heure au soleil pour le faire seicher et revenir
les couleurs. Aprés, estant le tableau sec, tu y peulx
estandre ton vernis de tourmentine.
at left bottom margin
Garde que les
couleurs ne s’enlevent.