004r - - - - - Vernis dhuile daspic
Il fault faire chaufer lhuile daspic & comme il commance
a fremir mects dedans la gomme de sandaraque en pouldre
affin quil soict bien tost fondu Et remue tousjours jusque
la sandaraque soict bien fondue sur foeu de charbon Ce
que tu cognoistras en prenant un peu dudict vernis sur
une assiette Et sil est gras en le maniant avecq le doigt
cest faict Et pour une lb dhuile daspic tu mectras
cinq onces de sandaraque pulverisee combien quaulcuns
nen mectent que quattre onces Mais il nest pas si bon
ni si gras Cestuy cy est promptement sec Les quadraniers
pour eviter la peyne de polir leur hebene le vernissent de
cestuy cy Les quiterniers aussi Cestuy cy nest pas si
propre pour les tableaulx que celuy de tourmentine fine
bien est il bon pour les mouleures des tableaulx On ne
souloit poinct vernir les paisages dun tableau quand le
vernis de lin estoict en usage pource quil faisoict jaulnir
le paisage Mays avecq celuy de tourmentine on vernist
par tout Tu y peulx mectre du mastic pulverise tire en larme ou
aultrement & il sera plus desiccatif au lieu de sandaraque
Si tu veulx vernir sur le plastre ou muraille donne
premierement ta colle de retaille bien chaulde car si elle
estoict refroidie elle nentreroit poinct dans la muraille
& quand tu y aurois mis ton vernis elle senleveroit
at left middle margin
Le vernis dhuile
daspic nest pas si
propre pour les couleurs
que celuy de tourmentine
car lhuile daspic
faict mourir mange les couleurs
pour estre trop penetrant
Pour oster le vernis dun
vieulx tableau qui est jaunastre
& le vernir de nouveau
Prens du savon blanc & de la cendree tamisee & le tout
destremper dans de leau Et avecq une esponge prens de
ladicte cendre & savon & en frotte le tableau Et comme
tu verras que le vieulx vernis sera oste Jecte un seau
deau contre le tableau pour le nettoyer Apres mects le
un quart dheure au soleil pour le faire seicher et revenir
les couleurs Apres estant le tableau sec tu y peulx
estandre ton vernis de tourmentine
at left middle margin
Garde que les
couleurs ne senlevent